ეს წიგნი გზადაგზა, ავტობუსსა თუ ელექტრო­მა­ტარებელში ნაფიქრი და ნააზრევია. ეს არის სამახსოვრო ჩანაწერები ოცნებებზე, იმედებზე და მოგონებებზე: დედის ხელებზე და პირველ კოცნაზე, ახლობელ ადამია­ნებ­ზე და ხანმოკლე შეხვედრებზე, დანაკარგზე და იმ ბე­დნიერებაზე, როცა შენი ესმით. იმაზე, რაც ყველას აღელვებს. ნათელი და ცოტათი ნაღვლიანი. ის, პირველ ყოვლისა, ცხოვრებაზეა.

„საგალობელნი სიყვარულისა“ უთუოდ გამორჩეული რომანია ფრანგი მწერლისა და მსახიობის, ანა ვიაზემსკის შემოქმედებაში. ნაწარმოებმა გამოქვეყნებისთანავე მიიპყრო კრიტიკოსების ყურადღება და რამდენიმე პრესტიჟული ლიტერატურული ჯილდოც დაიმსახურა. გამოცემისთანავე აღიარეს შედევრად. ფრანგმა რეჟისორმა, ჟან-პოლ სივეირაკმა, წიგნის მიხედვით გადაიღო ფილმი, რომელსაც ჟან ვიგოს სახელობის პრემია გადაეცა.

ალბათ, ესაა რომანი, ყველაზე კარგად რომ დაგვანახებს მწერლის შინაგან სამყაროს და ნათელს მოჰფენს მის ცხოვრებას. რომანს უწყვეტ რეფრენად გასდევს ცნობილი ფრანგი მომღერლის, ედით პიაფის ლეგენდარული სიმღერა, „საგალობელი სიყვარულისა“. პიაფმა, ამ გოგონა-ბეღურამ, ერთი საგალობელი უძღვნა ამ დიად გრძნობას, ანა ვიაზემსკიმ და მისმა მშობლებმა – მრავალი. ამიტომაც უწოდა „საგალობელნი“.

რომანი „ღამის ხმები“  ანატოლიაში მცხოვრები მდიდარი ორთაჩლიების ოჯახური საგაა, რომელიც მოიცავს ოთხი თაობის ისტორიას. მოქმედება ძირითადად ვითარდება ანატოლიაში, ბოზოვას მამულში, მე-20 საუკუნის 20-იანი წლებიდან 2000-იანი წლების დასაწყისამდე. ორთაჩლიების მდიდრული სასახლე  თავისი ბინადრების უამრავ საიდუმლოს, ინტრიგასა თუ სასიყვარულო ამბავს ინახავს. ორთაჩლიების ოჯახის მაგალითზე კარგად ჩანს ამ პერიოდში თურქეთში განვითარებული მოვლენები, პოლიტიკური ბატალიები და გაუთავებელი სამხედრო გადატრიალებები რა გავლენას ახდენდა მაშინდელ საზოგადოებაზე,   თაობებს შორის  ურთიერთობებზე. რომანში მრავლადაა მოთხრობილი სხვადასხვა პერსონაჟის ისტორიები, რომელთა ლოგიკური დასასრულიც ხდება დედის უჯრაში ქალიშვილის მიერ შემთხვევით აღმოჩენილი დღიურით გამჟღავნებული საიდუმლო, რაც პასუხს ცემს ყველა კითხვას და თავდაყირა აყენებს  მკითხველის ამა თუ იმ  პერსონაჟის მიმართ განწყობას.  რომანი თავიდანვე დიდი ინტერესით მიიღო მკითხველმა, თუმცა ბოლო წლებში აიშე ქულინმა გაიზიარა ელიფ შაფაქის ბედი და გამოუჩნდა კრიტიკოსებიც, რომლებიც მწერალს პედოფილიის ამსახველი მომენტების გამო მწვავედ აკრიტიკებდნენ.

თურქული წარმომავლობის ამერიკელი მწერლის, ასლი სანჯარის “ჰარამხანაში” აღწერილია ამბავი ჩრდილო კავკასიიდან მოტაცებული და სტამბოლში ტყვედ გაყიდული ჩერქეზი გოგონასი, რომელიც სულთნის ჰარამხანაში ხვდება.

წიგნში ცოცხალი ფერებით, ძალდაუტანებლად, რეალისტურად არის გადმოცემული ოსმალო ქალების, აგრეთვე ოსმალეთში ტყვედ გაყიდული და სულთნის ჰარამხანაში მოხვედრილი ჩერქეზი, ქართველი თუ სხვა ეროვნების ქალთა ცხოვრება; მათი ადგილი ოსმალური ტრადიციების, სასახლის კულტურის, ჰარამხანის წეს-ჩვეულებების ფონზე.