თქვენ წინაშეა 20 ლიეტუველი მწერალი ქალის მოთხრობების კრებული. თითოეული მწერალი წარმოდგენილია ერთი ან ორი მოთხრობით.
მიუხედავად იმისა, რომ თითქმის ყველა ე. წ. ქალურ მოთხრობას თან სდევს სიმარტოვის თავისებური სიმძაფრით აღწერა, არცერთ ტექსტში ოდნავადაც არ იგრძნობა იაფფასიანი სენტიმენტები, რომანტიკა ან პათეტიკა, რითიც მეტისმეტად გაჯერებულია ხოლმე თანამედროვე ლიტერატურა. აქ წარმოდგენილი არცერთი ავტორი არ არის ახალბედა და არა მარტო იმის გამო, რომ ამ ტექსტებამდე ბევრი აქვთ დაწერილი და გამოცემული, თითოეულ მათგანში იგრძნობა ინდივიდუალური მწერლური ხმა, თითოეული მათგანი თავისუფალია მოძველებული მხატვრული ქსოვილისგან, თხრობის მრავალგზის გამოყენებული ხერხებისგან და ახალი მხატვრული საშუალებები აქვს ნაპოვნი. პრობლემების ჩვენებისთვის დელიკატური, მინიშნებითი მხატვრული გამომსახველობა აქვთ არჩეული და ამით იმ ბეწვის ხიდს გადიან წარმატებით, ძალიან ხშირად საბედისწერო რომ გამხდარა ბევრი თანამედროვე მწერლისთვის, რომელთა ტექსტები არასამთავრობო ორგანიზაციის მანიფესტს უფრო მოგვაგონებს.
